و بينما أنا نائم في سابع نومة , إذ بالبرباش و تلته منوّ يقوماني "بطڤيّ" ! و حين فتحت مدوّنتي لأرى ما حصل في غيابي, و جدتهما يطالباني بالخضوع لقوانين اللّعبة الّتي إشترك فيها كلّ المدوّنين التّونسيين , شيبا و شبابا, بنينا و بناتا.
أوّل حاجة , نذكّر بالقوانين إلّي باش نذكرهم كيما قالهم البرباش حرفيّا (نعرفو قلبو كبير و ما يقول شي كيف نسرقلو حاجة من المدوّنة متاعو )
" قبل ما نبدى يلزمني نذكّر بقانون اللعبة: يلزمني نذكر ستة حاجات على روحي، اي حاجات، تنجم تكون اسرار، عادات، اللي هو... المفيد نقول أي حاجة و السلام (و ربي يلهينا في حوايجنا)... و من بعد نطڤي ستة مدونين اخرين و نمشي نقوللهم اللي انا طڤّيتهم عبر التعليق في آخر تدوينة ليهم... بخلاصة، قانون اللعبة هو الآتي:
1 – نذكر و نحط الروابط متاع المدونين اللي طڤّوني.
2 – نحط القانون متاع اللعبة في المدونة متاعي.
3 – نقول ستة حاجات على روحي، مهمة، مش مهمة... هذيكه اموري
4 – نطڤّي ستة مدونين اخرين
5 – المدونين هذوكه، نقوللهم اللي أنا طڤّيتهم، في المدونات متاعهم " (البرباش بتصرّف)
بون, الحاجة لولا :
مانيش منظّم جملة , لا في نومي , لا في دبشي , لا في قرايتي, لا في ماكلتي... تنجّم تقول عدو النّظام
الحاجة الثّانية :
أوّل حاجة نعملها كي نقعد ع الطّاولة هي نحل الموسيقى و بلا موسيقى ما نعمل شي . مغروم بكل ما عندو علاقة بالفن من MP3 , MP4, Ipod ... و عندي منهم شكارة بكلهم عادمين خاترني نشري فيهم من " المنصف باي" و باقي ما نشعفّش
الحاجة الثّالثة :
عندي غرام بالفلالس و الدّجاج و اللّي يقرى مدوّنتي هذي يعرف علاش , و نتمنّى تكون عندي مزرعة نربّي فيها إلّي نحب ...
الحاجة الرّابعة :
ما نسئل على حد , وما نحبّش شكون يسئل عليّا, و ما نهز التّاليفون و نكلّم دارنا كان كي تاكل بعضها و لاّ يطلبوني هوما .حتّى إلّي في الخارج يطلب و يروّح أكثر منّي. ربّي يهديني...
الحاجة الخامسة :
كنّت قرّاي م البريمة , و ديما لول في الكلاس متاعي, لكن ملّي خذيت الباك , تقول عين و صابتني, ما شفتش النّور, و هاني توّا نشاللّه آخر عام و نحضّر للكنترول .ربّي يستر ( ما نعرفّش علاش تذكّرتك توّا يا برباش , هه هه هه )
الحاجة السّادسة :
الحاجة السّادسة هي أنّي نحب ... الكسكسي بالفول و القدّيد , و ما نحبّش القرع بأنواعو
أمّا هاك الحب متاع الكتب ... مازلّت نسمع بيه سمعان و نضحك كيف واحد يجي يحكيلي أنّو يحب فلانة ويموت علاها ... تعجبني فلانة ممكن, أما نحبها و نولّي ما نحكي كان علاها و ... صعيب برشة
الحاجة السّابعة : آه قلتو ستّة أكهو ...
أووف , كمّلت .توّا الجماعة إلّي باش نطڤّيهم هوما :
ليست هناك تعليقات:
إرسال تعليق