Citation du jour

2‏/1‏/2009

القضية الفلسطنية ...


- بابا يا بابا.....يا بابا...
- تي اشبيك تصيح يا محمد علي..شبيك تبكي...
- راو جارنا " اسماعيل" فكلي كورتي و اعطاني طريحة ..
- ياخي انت شعملت..
- والله لا عملت شي..كل مرة هكا يجي يفكلنا الكورة انا ولولاد
و يعطينا طريحة و يجيب اولادو يلعبو..
- ماني قتلك كي تحب تلعب العب في الفسحة اللي تابعة دارنا..
- يا بابا ماو اليوم لعبت ثميكة انا ولولاد..جانا وطردنا وقالنا من اليوم..حتى هاذي ملكي و تابعتني..
- كيفاش كيفاش...هذيكا متاعنا من جد الجد..كيفاش متاعو..
- منعرفش والله..صاحبي حمزة راسو بالدم ضربو هزوه لسبيطار
وانا هاو ساقي توجع..وهو جابو اولادو وقال الوطا هذيا متاعي..
- شنية متاعو ياخي منطق قوة..
- يا بابا مش جارنا اسماعيل مش من البلاد ؟؟ شبيه يسكن هنا ؟
وشبيها الناس الكل تخاف منو ؟؟ ايييي ساقي....
- استنى نكلم عموماتك..نشوفو حل...
************************
- آالو اهلا بصالح..سافا يا خويا..اسمعني راو هاك اسماعيل جارنا ضرب ولدي دالي..وفك وطاتنا وقال متاعو...
- احممم...باهي خويا سالم انا عندي برشة مشاغل توا نجتمعو ونشوفو حل...يساعدك الشهر الجاي ؟
- يا صالح كيفاش الشهر الجاي..انا نقلك فك الوطا متاعنا..بعد شهر
يجي يفكلنا دارنا..
- والله الله غالب قبل منجمش تعرف مشاغل...ايا تشااااااو...
- شنية تشاو...يا صالح..يا صالح...
*************************
- بابا..بابا...كلم عمي " حسني" نعرفو راجل و يجي...
- آلو...آلو...حسونة خويا سافا ؟؟
- ايه سافا يا صالح...لاباس ماو صوتك يرعش...
- والله يا حسونة راو جارنا اسماعيل عمل بعمايلو ضرب لولاد وفك
الوطا اللي ورا الدار متاع جدودونا..وقال متاعو...
- صليح خويا اعفيني انا...تعرفني اسماعيل احسن " Client " عندي
تي يشري ب2 ملاين في الشهر سلعة..فك عليا بجاه ربي...
- امان يا صليح..راو هاد علينا باش يفكلنا حتى دارنا كان موقفناشي عند حدو...
- خويا وخليه يهزها الوطا..شنية المشكل...تي هيا قديمة..هيا خويا
كان استحقيت اي حاجة من خوك ادلل..بااااي.
- اي حاجة ؟؟ تي هاني قتلك واستحقيت اهم حاجة..الو..الو..علق..
**************************
- شنية الحل يا بابا ؟؟؟ انا نحب نكور في ارضنا..
- تي هام خلونا وحدنا يا دالي...
- بابا انا باش نلم ولاد الحومة و نهدو عليه...
- يا دالي ارجع وين ماشي..دالي ايـــجا...
**************************
- بابا...بابا...شفت ماو ...هاوكا خرج يجري..ولاد الحومة جاو معايا الكل..منعرفش خرج توا ولكن ممكن يرجع غدوة...اما قلي بابا علاش عموماتي عملو هكا ؟؟ انا كنت نحبهم...توا كرهتهم والله...
- يا وليدي ربي يهدي..عندهم الحق..راو " اسماعيل"...



©- copyright by Mahmoud BOUZID