Citation du jour

10‏/2‏/2008

الفــــلالس ...


كيف كنّت نقرى في المكتب , كان عندي برشة وقت فراغ , هذا إذا كان موش وقتي الكل كان وقت فراغ. و بما أنّو ما كانش عندي لا أرديناتار لا ألعاب ولا هم يحزنون, و حتّى مل حومة الجديدة إلّي نقّلنالها وقتها ما فاها حد من عمري تقريبا باش نكوّر معاه ولاّ نعمل معاه عمايل كيما في الحومة القديمة, كنّت تغرمّت بالفلالس و بالدّجاج حتّى وين قريب باش يسمّوني فلّوس من كثّر ما ربّيتهم و عدّيت معاهم وقت...
بديتها ملّول بالفلالس متاع بو ميا, نشري زوز ولاّتلاثة و نصنعلهم بيت بكردونة و نعمللهم فيها بيبان و شبابك ... و بالطّبيعة هاك الفلالس نسمّيهم و نرقد كيف يرقدو و نقوم كيف يقومو و نوكّلهم ملّي ناكلو...
و نتذكّر أنّو أمّي كانت تكرهّم خاتر ريحتي ولاّت ديما بريحة الفلالس و ديما كانو يعملوها في كل بلاصة رغم أنّي كنت عامللهم تواليت في الكردونة متاعهم.
بالشّوياّ بالشّويّا النّشاطات متاعي إطّورت و زدّت شريت دجاجات عربي و سردوك و السّطح متاع دارنا ردّيتو زريبة . و نتذكّر أنّو أسعد لحظات حياتي كانت كيف نبدى نتفرّج على العظم يفقّس و الفلالس خارجة منّو و تلقاني نحسبلهم باللّحظة و الدقيقة وقتاش يفقسو.
المملكة متاعي كبرت و وصلّت في وقت ما ولاّ عندي خمسين فلّوس و ما عادش إنّجّم لا نسمّيهم لا نوكّلهم, شريتلهم مرّة نوع من العلف متاع دجاج المكينة و ما عرفتش باش نخلّطهولهم, و كانت النّتيجة أنهم كلاووه و ما نجموش يخرجوه... و في ظرف تلاثة أيّام ماتو الكل رغم كل محاولاتي اليائسة ... و كنّت وقتها تعزّيني نقبل العزى ...
إييييه, أيّامات ... الحقيقة لحد الآن مازلّت مغروم بيهم :)

هناك 9 تعليقات:

mariouma يقول...

mala 7keya! :)
sa7a lik 3ala9al kont 3amel jaw n

Der Kameltreiber, Ladeeni ولد الصحرا يقول...

هاهاها

والله شدتني ضحكة مش نرمال

خاصة على فازة:شريتلهم مرّة نوع من العلف متاع دجاج المكينة و ما عرفتش باش نخلّطهولهم, و كانت النّتيجة أنهم كلاووه و ما نجموش يخرجوه

هاهاهاهاه

hope يقول...

cette histoire moi m'a rendu un peu triste parce que ça m'a prouvé que la vie etait beaucoup plus simple et que meme des chose simple nous rendaient heureux alors que maintenant.......

cactussa يقول...

c'etait tous simple mais ca donnait un vrai bonheur!!!ma7lena ki kona srhar!!la vie etais vrament rose!!! :)

jolanare يقول...

j'adore!!!si simple et si beau!!!

noussach يقول...

Et enfin tu es de retour welcome espérant que tu as bien passé tes examens
. Vrmt c'est une histoire émouvante au moins si on n'arrive pas a garder l'enfance en peux garder ses souvenirs

mennou يقول...

allah ghaleb ya wanted, c'est la vie on perd des choses et on gagne d'autres, l'important c'est de garder un bon souffle pour ce qu'arrivera, eddenya mechya w tos3ob w inchaallah rabbi ykattbelna ken el5ir...

ons يقول...

yè 7asra 3la essogr..sa77a lik yè wanted!!èni mma kènet m7arma 3linè ka3bè zèylè mè todkholch leddar, et bien que j'adorais les lapins aucune chance d'en avoir un :( 7ayartli mwèj3i yè wanted

Wanted يقول...

ihhh !! 3andi 7kaya ma3 laraneb zada :)