Citation du jour

20‏/2‏/2008

صعيب برشة ...


صعيب برشة ... أنّك تلقى مواطن تونسي ما عندوش بورطابل
صعيب برشة ... أنّك تلقى موظّف ما هوش واخذ قرض و لاّ زوز
صعيب برشة ... أنّك تلقى واحد عرّس ها النّهارين من غير طلوقات و لاّ كريديات
صعيب برشة ... أنّك تمشي تقضي شورك في مؤسّسة عموميّة من غير ما تتعطّل
صعيب برشة ... أنّك تكمّل قرايتك و تشد خدمة ديراكت, بلاش واسطات و لاّ معارف
صعيب برشة ... أنّك تلقى بطّال ما يتكيّفش و لاّ ما يشيّش و ما يخمّمش في الحرقة
صعيب برشة ... أنّك تلقى فيلم تونسي باهي , تنجّم تتفرّج فيه مع الفاميليا
صعيب برشة ... أنّك تلقى مسلسل مكسيكي أقل من 100 حلقة
صعيب برشة ... أنّك تبني أحلام في ها البلاد ... و تحقّقها
صعيب برشة ... أنّك تلقى واحد لاباس عليه .. خاتر كمّل قرايتو
صعيب برشة ... أنّا ما نهزّوش البطولة عام السّنا
صعيب برشة ... أنّك تلقى واحد ما يهزّش في القفّة لعرفو ولاّ ...
صعيب برشة ... أنّك تلقى راجل ما يخافش من مرتو
صعيب برشة ... أنّو أشغال المترو تكمل عام السّنا
صعيب برشة ... أنّك تلقى قطّوس يصطاد لربّي

ظاهرلي طوّّّّّّّّّّّّّّّّّّّّّّّّلّت , أيّا في لامان

هناك 4 تعليقات:

medjri يقول...

البطولة، ça dépend مع شكون انت الساعة!(;

gabsi يقول...

صعيب برشة و أنك هازز هالهم الكل و مازلت حي.

powerdev يقول...

Etoiliste bien sûr

miigaaloo يقول...

kif tkoun ya wanted tres pessimiste haka rak bech tet3eb we mech bech t9adem fi hyetik bech twalli win tji tkadem twakher