Citation du jour

8‏/1‏/2008

راس العــام...

لبارح قالو إلّي اللّيلة راس العام. ياخي العام قدّاش عندو من راس؟ ظاهر فيه عام السّنا بوراسين! ربّي يسترنا منّو. وحنا آش يهمناا, يقولولنا إحتفلو نحتفلو. قولولنا شنيّا المناسبة بركة, كانو راس العام السّوري توّا نشريّو "قاطو" و دجاجة روتي و ما تابعهم, و كان قالولنا راس العام العربي توّا نعملو شقالة كسكسي بالقدّيد و مولوخيّة...


حاصيلو المناسبات ما عاد نعرفوهم كان بالتمخميخ ! و لوكان يسألونا فانا عام هجري أحنا توّا توّا نقولولهم رانا ضيّعنا لحساب, تقريب ألف و أربعميا و حاجة... حتّى الأشهر الهجريّة ما حافظين فيهم كان تلاثة ولاّ أربعة شهور و البقيّة ما نسمعوش بيهم ...إلّي يقوم يعيّد نقومو نعيدو معاه و نفرحولو...
خلاصة القول أنّا ولّينا تقريبا بلا هويّة, لانا عرب كيف العرب, و لانا فرنسيس كيف الفرنسيس, أحنا بين بين.

و توّا نقوللكم نشالله عامكم مبروك ولّي تمنّيتو في راس العام السّوري الكل نعاود نتمنّاهولكم في راس العام هاذا زادا. و كان فمّا راس عام آخر في الثّنية قولولي باش نزيد نحتفل بالعام الجديد

هناك 8 تعليقات:

FREE-RACE يقول...

نشاء الله عامك مبروك يا "وانتد"..
عندي ملاحظة صغيرة خارجة عن الموضوع:
كل ما ندخل على مدونتك... مـُــضاد الفيروسات كاسبرسكي يخرّجلي تحذير شديد اللهجة... تحذير من مخاطر الدخول لموقع مدونتك بسبب تزامن فتحها مع خطر تجسس جاي من الموقع التالي:

www.mp3asset.com/swf/mp3/minime.swf
...ما فهمتش شنوة سبب هالمشكلة التقنية...أدعوك بحكم إختصاصك أنك تعالجها إن أمكن

samsoum يقول...

فمّا راس العام الارتودوكسي متاع روسيا نهار 14 جانفي و راس العام الصيني في فيفري بالذكر انو العام هذا هو عام الفار
:))

Wanted يقول...

ما نعرفّش علاش تفجعّت كيف نلقا أساميكم الزّوز تحت بعضها!! تقولش عليّا عرضوني باندية الحومة الرّيشارشي هاك علاه خفّت منكم :))
نشالله عامكم العربي و السوري و الصيني مبروكين

@free-race:j'espere que c'est reglé

Manar يقول...

3amkom mabrouk ennes lkoll et n7ebb ndhakrek ya wanted elli a7na fi 3am 1429 hijri,ken mouch el msg elli jeni lbere7 9alouli fih mabrouk 3lik 3am 1429 ejdid rani mana3refech, ama fena ch'har bedhabet hakkeka allahou a3lem, ken famma wa7ed fikom ya3ref i9olli, et merci :d

FREE-RACE يقول...

المشكلة تحلّت يا "وانتد"...و الإبحار أصبح آمن في مدونتك :) شكرا

Leyla يقول...

ثمة راجل أسمه
" محرم"
سفر
"صفر"
جمد مرتين
"جمادة الأولى"و"جمادة الثانية"
و قعد ربيعين
"ربيع الأول"و "الربيع الثاني"
عرضوهثلاثةرجال
"رجب"و"شعبان"و"رمضان"
شالوه
"شوال"
و قعدوه
"ذي القعدة"
و حججوه
"ذي الحجة"

Wanted يقول...

waw! hawa t3allamna 7aja moufida !
hazzouh ou 9a3douh ... cé vraiment tres pratique pour les mémoriser :)

DaliPotter يقول...

إنشاله عامك مبروك يا خويا.
هاو قالك ليوم 14 جانفي، راس العام العجمي. D:

حلوّة فازت جمد مرتين ياخي شالوه xDD