Citation du jour

12‏/1‏/2008

آه مل كار.....


صاحبي أحمد جاني آمس يشكيلي من همّ الكار إلّي ركبتلو لعصب و قريب باش تمرضو بالكلب. آنا لحقيقة نتضامن معاه و مع كل الخدّامة و الموظفين إلّي عالصّباح تلقاهم محشورين و في الّصندوق لصفر مغصورين. و بما أنّو قطاع المواصلات ديما لتالي و الأمور ديما ما تعجبّش رغم أنهم زادونا في القناطرو شراوولنا متروات جدد, إلاّ أنّو الزّحمة هي هي و الأمبوتيّاجات زادت شويّا بعد ما ولاّ كل من عندو شهريّة يمشي يتورّط في جرد كرهبة شعبيّة و يزيد يساهم في الزّحمة شويّة.
آنا الحق ما عنديش و الحمد لله مشكلة مع المواصلات بما أنّي ناخو سبيسيال متاع طلبة إلّي هي في الأصل مخصّة لزوز فويّيات متاع بنات معناها تلقاهي معبيا بالجنس اللّطيف و ما يقلّقنيش حتّى كيف تتعبّى كي السّردينة :)
و في الأخير, بما أنّو الحالة متاع النّقل ما تعجبّش و سعدها المكبوب ماهوش ناوي يقوم, فإنّي ندعو سي أحمد و كل من حس أنّو باش يموت بالغزّول جرّت هالترنسبورالمنحوس باش يتحلاّو بالصّبرو بطووووول البال و نذكّرهم إلّي الصّبر عندو منافع كبيرة . و إذا نجّمت تصبر عل كار راك تولّي بإذن اللّه ملقّح ضد جميع أنواع البشر إلّي مل مفروض ينطقو لحجرمل عوج متاعهم .
صحيح أنّو بلادنا ما هياش مطّورة ياسر ياسر لكن الحالة المزرية إلّي يتنقّل باها المواطن ما إدّلّش على أنّا نسكنو في بلاد عندها دار قدّاش من ألف سنا حضارة

آه باللّهي قبل ما ننسى و لو هي حكاية فارغة, الجماعة إلّي حسّو رواحهم تجرحو كيف حكيت عل مهندسين نشاللّه بركة ما يتغشّوش عليّا خاترني ما يلزمنيش نعمّم كيف نحكي, يا خويا حاشاكم و حاشا قدركم. أما ها الهوايش إلّي طاحو فيّا يسبّو و يتحلّفو, نقلّو خويا لعزيز, يا متاع الهندسة ,يلّي أقوى حاجة في حياتك "كلافيي" متاع لورديناتار, آنا هل مدوّنة نكتب فاها إلّي نحب, نحكي إلّي نحب, نحقر إلّي نحب, نهنتل إلّ نحب...إلّي عجبو عجبو ولّي ما عجبوش هاوكا لحيوط ياسر. باهي لحديث هكّا! واللاّهي ما فيباليش للدّرجة هاذي أموركم النّفسانيّة تاعبة
عجبتني التّصويرة يا برباش :)


هناك 5 تعليقات:

Ahmed.S يقول...

Merci Infinement Wanted,de bien exprimer mes sentiments envers la 38B, mon reve un jour est d avoir une 38B pour chaque citoyen tunisien.

البرباش يقول...

مش مشكل، خوذ راحتك

من بلد القيظ يقول...

صحّة ليك يا وحيّد، أما اللّي فادد من الكيران يركب كرّيطة،..

Lilou يقول...

مسكين يا أحمد مالا شنوة تقول كان جيت طفلة و تطلع في
515
أما الواحد اش عندو يعمل ناس تتولد في دول فقيرة وناس تتولد في دول غنية

غير معرف يقول...

Ma7la zinek
continue mon frere et laisse tomber les cons ;)