Citation du jour

5‏/1‏/2008

كل شي نورمـــا ل....




ما نحبّش روحي نظهر بمظهر الإنسان المربّط و المسكّر اللّي يشوف في كل شي غالط, لكن الحق لتوّا لا نجّمت نتأقلم مع بعض المواقف و المشاهد إلّي تعرضني في يوم واحد. و ما نجّمتش نتحمّلها ولاّ نتكيّف معاها... و يجيني إحساس غريب بالإشمئزاز و نتمنّى نهبط في ها العباد ضرب و شلابق...من بين ها المشاهد ولّي من المفروض أنّها عاديّة و ما تدعوش للإستغراب نذكروحدة قاعدة بجنب واحد... إيديهم في إيدين بعض ... وجوهم في وجوه بعض ... رجليهم على رجلين بعض... متركنين في تركينة ... شبي مخّك مشا لبعيد, تي نورمال كي لخوات راهم. و الأحلى كي تعمل روحك تغزرلهم تلقاهي شايخة و تضحك و ما يعبروكش جملة... المشهد الثاني مرا محترمة و لابسة لبسة تدل على أنها إنسانة ملتزمة برشة... و تمشي معاها بنتها. إلّي ما فهمتوش هو علاش المرا لابسة هكّة و بنتها لابسة سروال محزوق باش يتفتّق تحير كيفاش دخلت فيه ... زعمة الأم ما عرفتّش تربّي ولاّ البنيّة ما عرفتّش تفسّد أمها... المشهد الثّالث . واحد عامل لحية تبركلّه... صحيح قدّك في العمر, لكنّو فايق إبّرشة حاجات و سامع برشة كاساتات... تقعد معاه درج من الزّمان ياخي تبهت في الحديث إلّي يحكيهولك و يطلّعلك النّاس الكل كفّار و أوّلهم إنتي ... و يصوّرلك الحاكم في صورة الشّيطان .. تولّي تجبد روحك و تقلّو سامحني عندي قضية مستعجلة.. و تفصع بجلدك قبل ما تهد علينا اي مصيبة... على كل عارف أنهم بكلهم حاجات عاديّة جدّا و هاني عامل مجهودي باش نولّي من جماعة نورمـــال, و علاش نقلّق في روحي

هناك 3 تعليقات:

fouzi يقول...

إلللي احكيتو الكل نورمال ، يا ولدي

ons يقول...

chui d'accor m3ak yè wanted sauf en ce qui conserne la mère et la fille...peut être que ça paraît insensé et anormal mais enfin de compte on ne sait jamais chnèwè kènét 3amlè cette mère dans sa jeunesse et je vois que c'est plutôt raisonnable de ne pas obliger sa fille de porter "7ajèt mo7tarmè" comme tu le dis...il faut lui laisser le temps pour devenir mure et responsable et faire ses propres choix dans la vie tant que bien sur elle n'a pas dépassé les bornes...tab9a 3ad 7kèyét les bornes kol 7ad kifèch iraha

DaliPotter يقول...

يا ولدي نووورمااال ياسر.

الطفل والطفلة هاذوكم يتسمّاو عاقلين برشة مقارنة بعباد أخرين. إيييييه يا ولديى ماعندك ما شفت.

لمرا هاذيكا عادي جدّا. تي فمّا شكون تلقاهي متحجّبة وتسيّب بنتها تخرج للديسكوتيك مع نصف الليل مع 'صحابها'. ونووورمال بالطبيعة.

لا عادا جماعة اللّحية مريقلين، ماغير ما نقعد نحكي برشة xD

وديـما نقولوا : تونس بـخير D: